Devi Kavacha

अस्य श्रीचण्डीकवचस्य ब्रह्मा ऋषिः , अनुष्टुप् छन्दः , चामुण्डा देवता , अङ्गन्यासोक्तमातरो बीजम् , दिग्बन्धदेवतास्तत्वम् , श्रीजगदम्बाप्रीत्यर्थे जपे विनियोगः । ॐ नमश्चण्डिकायै । मार्कण्डेय उवाच । ॐ यद्गुह्यं परमं लोके सर्वरक्षाकरं नृणाम् । यन्न कस्यचिदाख्यातं तन्मे ब्रूहि पितामह ॥ १॥

অস্য শ্রীচণ্ডীকবচস্য ব্রহ্মা ঋষিঃ , অনুষ্টুপ্ ছন্দঃ , চামুণ্ডা দেবতা , অঙ্গন্যাসোক্তমাতরো বীজম্ , দিগ্বন্ধদেবতাস্তত্বম্ , শ্রীজগদম্বাপ্রীত্যর্থে জপে বিনিযোগঃ । ॐ নমশ্চণ্ডিকাযৈ । মার্কণ্ডেয উবাচ । ॐ যদ্গুহ্যং পরমং লোকে সর্বরক্ষাকরং নৃণাম্ । যন্ন কস্যচিদাখ্যাতং তন্মে ব্রূহি পিতামহ ॥ ১॥

asya śrīcaṇḍīkavacasya brahmā ṛṣiḥ , anuṣṭup chandaḥ , cāmuṇḍā devatā , aṅganyāsoktamātaro bījam , digbandhadevatāstatvam , śrījagadambāprītyarthe jape viniyogaḥ| oṃ namaścaṇḍikāyai| mārkaṇḍeya uvāca| oṃ yadguhyaṃ paramaṃ loke sarvarakṣākaraṃ nṛṇām| yanna kasyacidākhyātaṃ tanme brūhi pitāmaha|| 1||

ब्रह्मोवाच । अस्ति गुह्यतमं विप्र सर्वभूतोपकारकम् । देव्यास्तु कवचं पुण्यं तच्छृणुष्व महामुने ॥ २॥

ব্রহ্মোবাচ । অস্তি গুহ্যতমং বিপ্র সর্বভূতোপকারকম্ । দেব্যাস্তু কবচং পুণ্যং তচ্ছৃণুষ্ব মহামুনে ॥ ২॥

brahmovāca| asti guhyatamaṃ vipra sarvabhūtopakārakam| devyāstu kavacaṃ puṇyaṃ tacchṛṇuṣva mahāmune|| 2||

प्रथमं शैलपुत्रीति द्वितीयं ब्रह्मचारिणी । तृतीयं चन्द्रघण्टेति कूष्माण्डेति चतुर्थकम् ॥ ३॥

প্রথমং শৈলপুত্রীতি দ্বিতীযং ব্রহ্মচারিণী । তৃতীযং চন্দ্রঘণ্টেতি কূষ্মাণ্ডেতি চতুর্থকম্ ॥ ৩॥

prathamaṃ śailaputrīti dvitīyaṃ brahmacāriṇī| tṛtīyaṃ candraghaṇṭeti kūṣmāṇḍeti caturthakam|| 3||

पञ्चमं स्कन्दमातेति षष्ठं कात्यायनी तथा । सप्तमं कालरात्रिश्च महागौरीति चाष्टमम् ॥ ४॥

পঞ্চমং স্কন্দমাতেতি ষষ্ঠং কাত্যাযনী তথা । সপ্তমং কালরাত্রিশ্চ মহাগৌরীতি চাষ্টমম্ ॥ ৪॥

pañcamaṃ skandamāteti ṣaṣṭhaṃ kātyāyanī tathā| saptamaṃ kālarātriśca mahāgaurīti cāṣṭamam|| 4||

नवमं सिद्धिदात्री च नवदुर्गाः प्रकीर्तिताः । उक्तान्येतानि नामानि ब्रह्मणैव महात्मना ॥ ५॥

নবমং সিদ্ধিদাত্রী চ নবদুর্গাঃ প্রকীর্তিতাঃ । উক্তান্যেতানি নামানি ব্রহ্মণৈব মহাত্মনা ॥ ৫॥

navamaṃ siddhidātrī ca navadurgāḥ prakīrtitāḥ| uktānyetāni nāmāni brahmaṇaiva mahātmanā|| 5||

अग्निना दह्यमानास्तु शत्रुमध्यगता रणे । विषमे दुर्गमे चैव भयार्ताः शरणं गताः ॥ ६। न तेषां जायते किञ्चिदशुभं रणसङ्कटे । आपदं न च पश्यन्ति शोकदुःखभयङ्करीम् ॥ ७॥

অগ্নিনা দহ্যমানাস্তু শত্রুমধ্যগতা রণে । বিষমে দুর্গমে চৈব ভযার্তাঃ শরণং গতাঃ ॥ ৬। ন তেষাং জাযতে কিঞ্চিদশুভং রণসঙ্কটে । আপদং ন চ পশ্যন্তি শোকদুঃখভযঙ্করীম্ ॥ ৭॥

agninā dahyamānāstu śatrumadhyagatā raṇe| viṣame durgame caiva bhayārtāḥ śaraṇaṃ gatāḥ|| 6| na teṣāṃ jāyate kiñcidaśubhaṃ raṇasaṅkaṭe| āpadaṃ na ca paśyanti śokaduḥkhabhayaṅkarīm|| 7||

यैस्तु भक्त्या स्मृता नित्यं तेषां वृद्धिः प्रजायते । ये त्वां स्मरन्ति देवेशि रक्षसि तान्न संशयः ॥ ८॥

যৈস্তু ভক্ত্যা স্মৃতা নিত্যং তেষাং বৃদ্ধিঃ প্রজাযতে । যে ত্বাং স্মরন্তি দেবেশি রক্ষসি তান্ন সংশযঃ ॥ ৮॥

yaistu bhaktyā smṛtā nityaṃ teṣāṃ vṛddhiḥ prajāyate| ye tvāṃ smaranti deveśi rakṣasi tānna saṃśayaḥ|| 8||

प्रेतसंस्था तु चामुण्डा वाराही महिषासना । ऐन्द्री गजसमारूढा वैष्णवी गरुडासना ॥ ९॥

প্রেতসংস্থা তু চামুণ্ডা বারাহী মহিষাসনা । ঐন্দ্রী গজসমারূঢা বৈষ্ণবী গরুডাসনা ॥ ৯॥

pretasaṃsthā tu cāmuṇḍā vārāhī mahiṣāsanā| aindrī gajasamārūḍhā vaiṣṇavī garuḍāsanā|| 9||

नारसिंही महावीर्या शिवदूती महाबला । माहेश्वरी वृषारूढा कौमारी शिखिवाहना ॥ १०॥

নারসিংহী মহাবীর্যা শিবদূতী মহাবলা । মাহেশ্বরী বৃষারূঢা কৌমারী শিখিবাহনা ॥ ১০॥

nārasiṃhī mahāvīryā śivadūtī mahābalā| māheśvarī vṛṣārūḍhā kaumārī śikhivāhanā|| 10||

लक्ष्मीः पद्मासना देवी पद्महस्ता हरिप्रिया । श्वेतरूपधरा देवी ईश्वरी वृषवाहना ॥ ११॥

লক্ষ্মীঃ পদ্মাসনা দেবী পদ্মহস্তা হরিপ্রিযা । শ্বেতরূপধরা দেবী ঈশ্বরী বৃষবাহনা ॥ ১১॥

lakṣmīḥ padmāsanā devī padmahastā haripriyā| śvetarūpadharā devī īśvarī vṛṣavāhanā|| 11||

ब्राह्मी हंससमारूढा सर्वाभरणभूषिता । इत्येता मातरः सर्वाः सर्वयोगसमन्विताः ॥ १२॥

ব্রাহ্মী হংসসমারূঢা সর্বাভরণভূষিতা । ইত্যেতা মাতরঃ সর্বাঃ সর্বযোগসমন্বিতাঃ ॥ ১২॥

brāhmī haṃsasamārūḍhā sarvābharaṇabhūṣitā| ityetā mātaraḥ sarvāḥ sarvayogasamanvitāḥ|| 12||

नानाभरणशोभाढ्या नानारत्नोपशोभिताः । श्रैष्ठैश्च मौक्तिकैः सर्वा दिव्यहारप्रलम्बिभिः ॥ १३॥

নানাভরণশোভাঢ্যা নানারত্নোপশোভিতাঃ । শ্রৈষ্ঠৈশ্চ মৌক্তিকৈঃ সর্বা দিব্যহারপ্রলম্বিভিঃ ॥ ১৩॥

nānābharaṇaśobhāḍhyā nānāratnopaśobhitāḥ| śraiṣṭhaiśca mauktikaiḥ sarvā divyahārapralambibhiḥ|| 13||

इन्द्रनीलैर्महानीलैः पद्मरागैः सुशोभनैः । दृश्यन्ते रथमारूढा देव्यः क्रोधसमाकुलाः ॥ १४॥

ইন্দ্রনীলৈর্মহানীলৈঃ পদ্মরাগৈঃ সুশোভনৈঃ । দৃশ্যন্তে রথমারূঢা দেব্যঃ ক্রোধসমাকুলাঃ ॥ ১৪॥

indranīlairmahānīlaiḥ padmarāgaiḥ suśobhanaiḥ| dṛśyante rathamārūḍhā devyaḥ krodhasamākulāḥ|| 14||

शङ्खं चक्रं गदां शक्तिं हलं च मुसलायुधम् । खेटकं तोमरं चैव परशुं पाशमेव च ॥ १५॥

শঙ্খং চক্রং গদাং শক্তিং হলং চ মুসলাযুধম্ । খেটকং তোমরং চৈব পরশুং পাশমেব চ ॥ ১৫॥

śaṅkhaṃ cakraṃ gadāṃ śaktiṃ halaṃ ca musalāyudham| kheṭakaṃ tomaraṃ caiva paraśuṃ pāśameva ca|| 15||

कुन्तायुधं त्रिशूलं च शार्ङ्गमायुधमुत्तमम् । दैत्यानां देहनाशाय भक्तानामभयाय च ॥ १६॥

কুন্তাযুধং ত্রিশূলং চ শার্ঙ্গমাযুধমুত্তমম্ । দৈত্যানাং দেহনাশায ভক্তানামভযায চ ॥ ১৬॥

kuntāyudhaṃ triśūlaṃ ca śārṅgamāyudhamuttamam| daityānāṃ dehanāśāya bhaktānāmabhayāya ca|| 16||

धारयन्त्यायुधानीत्थं देवानां च हिताय वै । नमस्तेऽस्तु महारौद्रे महाघोरपराक्रमे ॥ १७॥

ধারযন্ত্যাযুধানীত্থং দেবানাং চ হিতায বৈ । নমস্তেঽস্তু মহারৌদ্রে মহাঘোরপরাক্রমে ॥ ১৭॥

dhārayantyāyudhānītthaṃ devānāṃ ca hitāya vai| namaste'stu mahāraudre mahāghoraparākrame|| 17||

महाबले महोत्साहे महाभयविनाशिनि । त्राहि मां देवि दुष्प्रेक्ष्ये शत्रूणां भयवर्धिनि ॥ १८॥

মহাবলে মহোত্সাহে মহাভযবিনাশিনি । ত্রাহি মাং দেবি দুষ্প্রেক্ষ্যে শত্রূণাং ভযবর্ধিনি ॥ ১৮॥

mahābale mahotsāhe mahābhayavināśini| trāhi māṃ devi duṣprekṣye śatrūṇāṃ bhayavardhini|| 18||

प्राच्यां रक्षतु मामैन्द्री आग्नेय्यामग्निदेवता । दक्षिणेऽवतु वाराही नैरृत्यां खड्गधारिणी ॥ १९॥

প্রাচ্যাং রক্ষতু মামৈন্দ্রী আগ্নেয্যামগ্নিদেবতা । দক্ষিণেঽবতু বারাহী নৈরৃত্যাং খড্গধারিণী ॥ ১৯॥

prācyāṃ rakṣatu māmaindrī āgneyyāmagnidevatā| dakṣiṇe'vatu vārāhī nairṛtyāṃ khaḍgadhāriṇī|| 19||

प्रतीच्यां वारुणी रक्षेद्वायव्यां मृगवाहिनी । उदीच्यां पातु कौबेरी ईशान्यां शूलधारिणी ॥ २०॥

প্রতীচ্যাং বারুণী রক্ষেদ্বাযব্যাং মৃগবাহিনী । উদীচ্যাং পাতু কৌবেরী ঈশান্যাং শূলধারিণী ॥ ২০॥

pratīcyāṃ vāruṇī rakṣedvāyavyāṃ mṛgavāhinī| udīcyāṃ pātu kauberī īśānyāṃ śūladhāriṇī|| 20||

ऊर्ध्वं ब्रह्माणी मे रक्षेदधस्ताद्वैष्णवी तथा । एवं दश दिशो रक्षेच्चामुण्डा शववाहना ॥ २१॥

ঊর্ধ্বং ব্রহ্মাণী মে রক্ষেদধস্তাদ্বৈষ্ণবী তথা । এবং দশ দিশো রক্ষেচ্চামুণ্ডা শববাহনা ॥ ২১॥

ūrdhvaṃ brahmāṇī me rakṣedadhastādvaiṣṇavī tathā| evaṃ daśa diśo rakṣeccāmuṇḍā śavavāhanā|| 21||

जया मामग्रतः पातु विजया पातु पृष्ठतः । अजिता वामपार्श्वे तु दक्षिणे चापराजिता ॥ २२॥

জযা মামগ্রতঃ পাতু বিজযা পাতু পৃষ্ঠতঃ । অজিতা বামপার্শ্বে তু দক্ষিণে চাপরাজিতা ॥ ২২॥

jayā māmagrataḥ pātu vijayā pātu pṛṣṭhataḥ| ajitā vāmapārśve tu dakṣiṇe cāparājitā|| 22||

शिखां मे द्योतिनी रक्षेदुमा मूर्ध्नि व्यवस्थिता । मालाधरी ललाटे च भ्रुवौ रक्षेद्यशस्विनी ॥ २३॥

শিখাং মে দ্যোতিনী রক্ষেদুমা মূর্ধ্নি ব্যবস্থিতা । মালাধরী ললাটে চ ভ্রুবৌ রক্ষেদ্যশস্বিনী ॥ ২৩॥

śikhāṃ me dyotinī rakṣedumā mūrdhni vyavasthitā| mālādharī lalāṭe ca bhruvau rakṣedyaśasvinī|| 23||

नेत्रयोश्चित्रनेत्रा च यमघण्टा तु पार्श्वके । त्रिनेत्रा च त्रिशूलेन भ्रुवोर्मध्ये च चण्डिका ॥ २४॥

নেত্রযোশ্চিত্রনেত্রা চ যমঘণ্টা তু পার্শ্বকে । ত্রিনেত্রা চ ত্রিশূলেন ভ্রুবোর্মধ্যে চ চণ্ডিকা ॥ ২৪॥

netrayościtranetrā ca yamaghaṇṭā tu pārśvake| trinetrā ca triśūlena bhruvormadhye ca caṇḍikā|| 24||

शङ्खिनी चक्षुषोर्मध्ये श्रोत्रयोर्द्वारवासिनी । कपोलौ कालिका रक्षेत् कर्णमूले तु शङ्करी ॥ २५॥

শঙ্খিনী চক্ষুষোর্মধ্যে শ্রোত্রযোর্দ্বারবাসিনী । কপোলৌ কালিকা রক্ষেত্ কর্ণমূলে তু শঙ্করী ॥ ২৫॥

śaṅkhinī cakṣuṣormadhye śrotrayordvāravāsinī| kapolau kālikā rakṣet karṇamūle tu śaṅkarī|| 25||

नासिकायां सुगन्धा च उत्तरोष्ठे च चर्चिका । अधरे चामृताबाला जिह्वायां च सरस्वती ॥ २६॥

নাসিকাযাং সুগন্ধা চ উত্তরোষ্ঠে চ চর্চিকা । অধরে চামৃতাবালা জিহ্বাযাং চ সরস্বতী ॥ ২৬॥

nāsikāyāṃ sugandhā ca uttaroṣṭhe ca carcikā| adhare cāmṛtābālā jihvāyāṃ ca sarasvatī|| 26||

दन्तान् रक्षतु कौमारी कण्ठदेशे तु चण्डिका । घण्टिकां चित्रघण्टा च महामाया च तालुके ॥ २७॥

দন্তান্ রক্ষতু কৌমারী কণ্ঠদেশে তু চণ্ডিকা । ঘণ্টিকাং চিত্রঘণ্টা চ মহামাযা চ তালুকে ॥ ২৭॥

dantān rakṣatu kaumārī kaṇṭhadeśe tu caṇḍikā| ghaṇṭikāṃ citraghaṇṭā ca mahāmāyā ca tāluke|| 27||

कामाक्षी चिबुकं रक्षेद्वाचं मे सर्वमङ्गला । ग्रीवायां भद्रकाली च पृष्ठवंशे धनुर्धरी ॥ २८॥

কামাক্ষী চিবুকং রক্ষেদ্বাচং মে সর্বমঙ্গলা । গ্রীবাযাং ভদ্রকালী চ পৃষ্ঠবংশে ধনুর্ধরী ॥ ২৮॥

kāmākṣī cibukaṃ rakṣedvācaṃ me sarvamaṅgalā| grīvāyāṃ bhadrakālī ca pṛṣṭhavaṃśe dhanurdharī|| 28||

नीलग्रीवा बहिः कण्ठे नलिकां नलकूबरी । स्कन्धयोः खड्गिनी रक्षेद् बाहू मे वज्रधारिणी ॥ २९॥

নীলগ্রীবা বহিঃ কণ্ঠে নলিকাং নলকূবরী । স্কন্ধযোঃ খড্গিনী রক্ষেদ্ বাহূ মে বজ্রধারিণী ॥ ২৯॥

nīlagrīvā bahiḥ kaṇṭhe nalikāṃ nalakūbarī| skandhayoḥ khaḍginī rakṣed bāhū me vajradhāriṇī|| 29||

हस्तयोर्दण्डिनी रक्षेदम्बिका चाङ्गुलीषु च । नखाञ्छूलेश्वरी रक्षेत् कुक्षौ रक्षेन्नरेश्वरी ॥ ३०॥

হস্তযোর্দণ্ডিনী রক্ষেদম্বিকা চাঙ্গুলীষু চ । নখাঞ্ছূলেশ্বরী রক্ষেত্ কুক্ষৌ রক্ষেন্নরেশ্বরী ॥ ৩০॥

hastayordaṇḍinī rakṣedambikā cāṅgulīṣu ca| nakhāñchūleśvarī rakṣet kukṣau rakṣennareśvarī|| 30||

स्तनौ रक्षेन्महादेवी मनःशोकविनाशिनी । हृदये ललिता देवी उदरे शूलधारिणी ॥ ३१॥

স্তনৌ রক্ষেন্মহাদেবী মনঃশোকবিনাশিনী । হৃদযে ললিতা দেবী উদরে শূলধারিণী ॥ ৩১॥

stanau rakṣenmahādevī manaḥśokavināśinī| hṛdaye lalitā devī udare śūladhāriṇī|| 31||

नाभौ च कामिनी रक्षेद् गुह्यं गुह्येश्वरी तथा । मेढ्रं रक्षतु दुर्गन्धा पायुं मे गुह्यवाहिनी ॥ ३२॥

নাভৌ চ কামিনী রক্ষেদ্ গুহ্যং গুহ্যেশ্বরী তথা । মেঢ্রং রক্ষতু দুর্গন্ধা পাযুং মে গুহ্যবাহিনী ॥ ৩২॥

nābhau ca kāminī rakṣed guhyaṃ guhyeśvarī tathā| meḍhraṃ rakṣatu durgandhā pāyuṃ me guhyavāhinī|| 32||

कट्यां भगवती रक्षेदूरू मे मेघवाहना । जङ्घे महाबला रक्षेत् जानू माधवनायिका ॥ ३३॥

কট্যাং ভগবতী রক্ষেদূরূ মে মেঘবাহনা । জঙ্ঘে মহাবলা রক্ষেত্ জানূ মাধবনাযিকা ॥ ৩৩॥

kaṭyāṃ bhagavatī rakṣedūrū me meghavāhanā| jaṅghe mahābalā rakṣet jānū mādhavanāyikā|| 33||

गुल्फयोर्नारसिंही च पादपृष्ठे तु कौशिकी । पादाङ्गुलीः श्रीधरी च तलं पातालवासिनी ॥ ३४॥

গুল্ফযোর্নারসিংহী চ পাদপৃষ্ঠে তু কৌশিকী । পাদাঙ্গুলীঃ শ্রীধরী চ তলং পাতালবাসিনী ॥ ৩৪॥

gulphayornārasiṃhī ca pādapṛṣṭhe tu kauśikī| pādāṅgulīḥ śrīdharī ca talaṃ pātālavāsinī|| 34||

नखान् दंष्ट्रकराली च केशांश्चैवोर्ध्वकेशिनी । रोमकूपेषु कौमारी त्वचं योगीश्वरी तथा ॥ ३५॥

নখান্ দংষ্ট্রকরালী চ কেশাংশ্চৈবোর্ধ্বকেশিনী । রোমকূপেষু কৌমারী ত্বচং যোগীশ্বরী তথা ॥ ৩৫॥

nakhān daṃṣṭrakarālī ca keśāṃścaivordhvakeśinī| romakūpeṣu kaumārī tvacaṃ yogīśvarī tathā|| 35||

रक्तमज्जावसामांसान्यस्थिमेदांसि पार्वती । अन्त्राणि कालरात्रिश्च पित्तं च मुकुटेश्वरी ॥ ३६॥

রক্তমজ্জাবসামাংসান্যস্থিমেদাংসি পার্বতী । অন্ত্রাণি কালরাত্রিশ্চ পিত্তং চ মুকুটেশ্বরী ॥ ৩৬॥

raktamajjāvasāmāṃsānyasthimedāṃsi pārvatī| antrāṇi kālarātriśca pittaṃ ca mukuṭeśvarī|| 36||

पद्मावती पद्मकोशे कफे चूडामणिस्तथा । ज्वालामुखी नखज्वालामभेद्या सर्वसन्धिषु ॥ ३७॥

পদ্মাবতী পদ্মকোশে কফে চূডামণিস্তথা । জ্বালামুখী নখজ্বালামভেদ্যা সর্বসন্ধিষু ॥ ৩৭॥

padmāvatī padmakośe kaphe cūḍāmaṇistathā| jvālāmukhī nakhajvālāmabhedyā sarvasandhiṣu|| 37||

शुक्रं ब्रह्माणी मे रक्षेच्छायां छत्रेश्वरी तथा । अहङ्कारं मनो बुद्धिं रक्षेन्मे धर्मधारिणी ॥ ३८॥

শুক্রং ব্রহ্মাণী মে রক্ষেচ্ছাযাং ছত্রেশ্বরী তথা । অহঙ্কারং মনো বুদ্ধিং রক্ষেন্মে ধর্মধারিণী ॥ ৩৮॥

śukraṃ brahmāṇī me rakṣecchāyāṃ chatreśvarī tathā| ahaṅkāraṃ mano buddhiṃ rakṣenme dharmadhāriṇī|| 38||

प्राणापानौ तथा व्यानमुदानं च समानकम् । वज्रहस्ता च मे रक्षेत् प्राणान् कल्याणशोभना ॥ ३९॥

প্রাণাপানৌ তথা ব্যানমুদানং চ সমানকম্ । বজ্রহস্তা চ মে রক্ষেত্ প্রাণান্ কল্যাণশোভনা ॥ ৩৯॥

prāṇāpānau tathā vyānamudānaṃ ca samānakam| vajrahastā ca me rakṣet prāṇān kalyāṇaśobhanā|| 39||

रसे रूपे च गन्धे च शब्दे स्पर्शे च योगिनी । सत्त्वं रजस्तमश्चैव रक्षेन्नारायणी सदा ॥ ४०॥

রসে রূপে চ গন্ধে চ শব্দে স্পর্শে চ যোগিনী । সত্ত্বং রজস্তমশ্চৈব রক্ষেন্নারাযণী সদা ॥ ৪০॥

rase rūpe ca gandhe ca śabde sparśe ca yoginī| sattvaṃ rajastamaścaiva rakṣennārāyaṇī sadā|| 40||

आयू रक्षतु वाराही धर्मं रक्षतु पार्वती । यशः कीर्तिं च लक्ष्मीं च सदा रक्षतु वैष्णवी ॥ ४१॥

আযূ রক্ষতু বারাহী ধর্মং রক্ষতু পার্বতী । যশঃ কীর্তিং চ লক্ষ্মীং চ সদা রক্ষতু বৈষ্ণবী ॥ ৪১॥

āyū rakṣatu vārāhī dharmaṃ rakṣatu pārvatī| yaśaḥ kīrtiṃ ca lakṣmīṃ ca sadā rakṣatu vaiṣṇavī|| 41||

गोत्रमिन्द्राणी मे रक्षेत् पशून् रक्षेच्च चण्डिका । पुत्रान् रक्षेन्महालक्ष्मीर्भार्यां रक्षतु भैरवी ॥ ४२॥

গোত্রমিন্দ্রাণী মে রক্ষেত্ পশূন্ রক্ষেচ্চ চণ্ডিকা । পুত্রান্ রক্ষেন্মহালক্ষ্মীর্ভার্যাং রক্ষতু ভৈরবী ॥ ৪২॥

gotramindrāṇī me rakṣet paśūn rakṣecca caṇḍikā| putrān rakṣenmahālakṣmīrbhāryāṃ rakṣatu bhairavī|| 42||

धनेश्वरी धनं रक्षेत् कौमारी कन्यकां तथा । पन्थानं सुपथा रक्षेन्मार्गं क्षेमङ्करी तथा ॥ ४३॥

ধনেশ্বরী ধনং রক্ষেত্ কৌমারী কন্যকাং তথা । পন্থানং সুপথা রক্ষেন্মার্গং ক্ষেমঙ্করী তথা ॥ ৪৩॥

dhaneśvarī dhanaṃ rakṣet kaumārī kanyakāṃ tathā| panthānaṃ supathā rakṣenmārgaṃ kṣemaṅkarī tathā|| 43||

राजद्वारे महालक्ष्मीर्विजया सतत स्थिता । रक्षाहीनं तु यत् स्थानं वर्जितं कवचेन तु ॥ ४४॥

রাজদ্বারে মহালক্ষ্মীর্বিজযা সতত স্থিতা । রক্ষাহীনং তু যত্ স্থানং বর্জিতং কবচেন তু ॥ ৪৪॥

rājadvāre mahālakṣmīrvijayā satata sthitā| rakṣāhīnaṃ tu yat sthānaṃ varjitaṃ kavacena tu|| 44||

तत्सर्वं रक्ष मे देवि जयन्ती पापनाशिनी । सर्वरक्षाकरं पुण्यं कवचं सर्वदा जपेत् ॥ ४५॥

তত্সর্বং রক্ষ মে দেবি জযন্তী পাপনাশিনী । সর্বরক্ষাকরং পুণ্যং কবচং সর্বদা জপেত্ ॥ ৪৫॥

tatsarvaṃ rakṣa me devi jayantī pāpanāśinī| sarvarakṣākaraṃ puṇyaṃ kavacaṃ sarvadā japet|| 45||

इदं रहस्यं विप्रर्षे भक्त्या तव मयोदितम् । पादमेकं न गच्छेत् तु यदीच्छेच्छुभमात्मनः ॥ ४६॥

ইদং রহস্যং বিপ্রর্ষে ভক্ত্যা তব মযোদিতম্ । পাদমেকং ন গচ্ছেত্ তু যদীচ্ছেচ্ছুভমাত্মনঃ ॥ ৪৬॥

idaṃ rahasyaṃ viprarṣe bhaktyā tava mayoditam| pādamekaṃ na gacchet tu yadīcchecchubhamātmanaḥ|| 46||

कवचेनावृतो नित्यं यत्र यत्रैव गच्छति । तत्र तत्रार्थलाभश्व विजयः सार्वकालिकः ॥ ४७॥

কবচেনাবৃতো নিত্যং যত্র যত্রৈব গচ্ছতি । তত্র তত্রার্থলাভশ্ব বিজযঃ সার্বকালিকঃ ॥ ৪৭॥

kavacenāvṛto nityaṃ yatra yatraiva gacchati| tatra tatrārthalābhaśva vijayaḥ sārvakālikaḥ|| 47||

यं यं चिन्तयते कामं तं तं प्राप्नोति निश्चितम् । परमैश्वर्यमतुलं प्राप्स्यते भूतले पुमान् ॥ ४८॥

যং যং চিন্তযতে কামং তং তং প্রাপ্নোতি নিশ্চিতম্ । পরমৈশ্বর্যমতুলং প্রাপ্স্যতে ভূতলে পুমান্ ॥ ৪৮॥

yaṃ yaṃ cintayate kāmaṃ taṃ taṃ prāpnoti niścitam| paramaiśvaryamatulaṃ prāpsyate bhūtale pumān|| 48||

निर्भयो जायते मर्त्यः सङ्ग्रामेष्वपराजितः । त्रैलोक्ये तु भवेत्पूज्यः कवचेनावृतः पुमान् ॥ ४९॥

নির্ভযো জাযতে মর্ত্যঃ সঙ্গ্রামেষ্বপরাজিতঃ । ত্রৈলোক্যে তু ভবেত্পূজ্যঃ কবচেনাবৃতঃ পুমান্ ॥ ৪৯॥

nirbhayo jāyate martyaḥ saṅgrāmeṣvaparājitaḥ| trailokye tu bhavetpūjyaḥ kavacenāvṛtaḥ pumān|| 49||

इदं तु देव्याः कवचं देवानामपि दुर्लभम् । यः पठेत्प्रयतो नित्यं त्रिसन्ध्यं श्रद्धयान्वितः ॥ ५०॥

ইদং তু দেব্যাঃ কবচং দেবানামপি দুর্লভম্ । যঃ পঠেত্প্রযতো নিত্যং ত্রিসন্ধ্যং শ্রদ্ধযান্বিতঃ ॥ ৫০॥

idaṃ tu devyāḥ kavacaṃ devānāmapi durlabham| yaḥ paṭhetprayato nityaṃ trisandhyaṃ śraddhayānvitaḥ|| 50||

दैवीकला भवेत्तस्य त्रैलोक्ये चापराजितः । जीवेद्वर्षशतं साग्रमपमृत्युविवर्जितः ॥ ५१॥

দৈবীকলা ভবেত্তস্য ত্রৈলোক্যে চাপরাজিতঃ । জীবেদ্বর্ষশতং সাগ্রমপমৃত্যুবিবর্জিতঃ ॥ ৫১॥

daivīkalā bhavettasya trailokye cāparājitaḥ| jīvedvarṣaśataṃ sāgramapamṛtyuvivarjitaḥ|| 51||

नश्यन्ति व्याधयः सर्वे लूताविस्फोटकादयः । स्थावरं जङ्गमं चैव कृत्रिमं चैव यद्विषम् ॥ ५२॥

নশ্যন্তি ব্যাধযঃ সর্বে লূতাবিস্ফোটকাদযঃ । স্থাবরং জঙ্গমং চৈব কৃত্রিমং চৈব যদ্বিষম্ ॥ ৫২॥

naśyanti vyādhayaḥ sarve lūtāvisphoṭakādayaḥ| sthāvaraṃ jaṅgamaṃ caiva kṛtrimaṃ caiva yadviṣam|| 52||

अभिचाराणि सर्वाणि मन्त्रयन्त्राणि भूतले । भूचराः खेचराश्चैव कुलजाश्चौपदेशिकाः ॥ ५३॥

অভিচারাণি সর্বাণি মন্ত্রযন্ত্রাণি ভূতলে । ভূচরাঃ খেচরাশ্চৈব কুলজাশ্চৌপদেশিকাঃ ॥ ৫৩॥

abhicārāṇi sarvāṇi mantrayantrāṇi bhūtale| bhūcarāḥ khecarāścaiva kulajāścaupadeśikāḥ|| 53||

सहजा कुलजा माला डाकिनी शाकिनी तथा । अन्तरिक्षचरा घोरा डाकिन्यश्च महारवाः ॥ ५४॥

সহজা কুলজা মালা ডাকিনী শাকিনী তথা । অন্তরিক্ষচরা ঘোরা ডাকিন্যশ্চ মহারবাঃ ॥ ৫৪॥

sahajā kulajā mālā ḍākinī śākinī tathā| antarikṣacarā ghorā ḍākinyaśca mahāravāḥ|| 54||

ग्रहभूतपिशाचाश्च यक्षगन्धर्वराक्षसाः । ब्रह्मराक्षसवेतालाः कूष्माण्डा भैरवादयः ॥ ५५॥

গ্রহভূতপিশাচাশ্চ যক্ষগন্ধর্বরাক্ষসাঃ । ব্রহ্মরাক্ষসবেতালাঃ কূষ্মাণ্ডা ভৈরবাদযঃ ॥ ৫৫॥

grahabhūtapiśācāśca yakṣagandharvarākṣasāḥ| brahmarākṣasavetālāḥ kūṣmāṇḍā bhairavādayaḥ|| 55||

नश्यन्ति दर्शनात्तस्य कवचेनावृतो हि यः । मानोन्नतिर्भवेद्राज्ञस्तेजोवृद्धिः परा भवेत् ॥ ५६॥

নশ্যন্তি দর্শনাত্তস্য কবচেনাবৃতো হি যঃ । মানোন্নতির্ভবেদ্রাজ্ঞস্তেজোবৃদ্ধিঃ পরা ভবেত্ ॥ ৫৬॥

naśyanti darśanāttasya kavacenāvṛto hi yaḥ| mānonnatirbhavedrājñastejovṛddhiḥ parā bhavet|| 56||

यशोवृद्धिर्भवेत् पुंसां कीर्तिवृद्धिश्च जायते । तस्मात् जपेत् सदा भक्तः कवचं कामदं मुने ॥ ५७॥

যশোবৃদ্ধির্ভবেত্ পুংসাং কীর্তিবৃদ্ধিশ্চ জাযতে । তস্মাত্ জপেত্ সদা ভক্তঃ কবচং কামদং মুনে ॥ ৫৭॥

yaśovṛddhirbhavet puṃsāṃ kīrtivṛddhiśca jāyate| tasmāt japet sadā bhaktaḥ kavacaṃ kāmadaṃ mune|| 57||

जपेत् सप्तशतीं चण्डीं कृत्वा तु कवचं पुरा । निर्विघ्नेन भवेत् सिद्धिश्चण्डीजपसमुद्भवा ॥ ५८॥

জপেত্ সপ্তশতীং চণ্ডীং কৃত্বা তু কবচং পুরা । নির্বিঘ্নেন ভবেত্ সিদ্ধিশ্চণ্ডীজপসমুদ্ভবা ॥ ৫৮॥

japet saptaśatīṃ caṇḍīṃ kṛtvā tu kavacaṃ purā| nirvighnena bhavet siddhiścaṇḍījapasamudbhavā|| 58||

यावद्भूमण्डलं धत्ते सशैलवनकाननम् । तावत्तिष्ठति मेदिन्यां सन्ततिः पुत्रपौत्रिकी ॥ ५९॥

যাবদ্ভূমণ্ডলং ধত্তে সশৈলবনকাননম্ । তাবত্তিষ্ঠতি মেদিন্যাং সন্ততিঃ পুত্রপৌত্রিকী ॥ ৫৯॥

yāvadbhūmaṇḍalaṃ dhatte saśailavanakānanam| tāvattiṣṭhati medinyāṃ santatiḥ putrapautrikī|| 59||

देहान्ते परमं स्थानं सुरैरपि सुदुर्लभम् । प्राप्नोति पुरुषो नित्यं महामायाप्रसादतः ॥ ६०॥

দেহান্তে পরমং স্থানং সুরৈরপি সুদুর্লভম্ । প্রাপ্নোতি পুরুষো নিত্যং মহামাযাপ্রসাদতঃ ॥ ৬০॥

dehānte paramaṃ sthānaṃ surairapi sudurlabham| prāpnoti puruṣo nityaṃ mahāmāyāprasādataḥ|| 60||

तत्र गच्छति गत्वासौ पुनश्चागमनं नहि । लभते परमं स्थानं शिवेन समतां व्रजेत् ॥ ६१॥

তত্র গচ্ছতি গত্বাসৌ পুনশ্চাগমনং নহি । লভতে পরমং স্থানং শিবেন সমতাং ব্রজেত্ ॥ ৬১॥

tatra gacchati gatvāsau punaścāgamanaṃ nahi| labhate paramaṃ sthānaṃ śivena samatāṃ vrajet|| 61||

॥ इति श्रीमार्कण्डेयपुराणे हरिहरब्रह्मविरचितं देवीकवचं समाप्तम् ॥

॥ ইতি শ্রীমার্কণ্ডেযপুরাণে হরিহরব্রহ্মবিরচিতং দেবীকবচং সমাপ্তম্ ॥

|| iti śrīmārkaṇḍeyapurāṇe hariharabrahmaviracitaṃ devīkavacaṃ samāptam||